中環出更：高永文將撬票責任攬上身
政府宣傳政改方案工作如火如荼，食物及衞生局局長高永文尋日出席國際護士節活動，不停借位宣傳政改。佢明明講緊跑步做運動，都話要努力跑到二○一七，仲話覺得自己有責任游說醫學界立法會議員梁家騮同衞生服務界李國麟，投票支持政改方案。高永文出口術將撬票責任攬上身，唔知其他政策局局長有冇覺得有壓力，應該去游說自己監管範疇內嘅功能組別立法會議員投贊成票呢？
話游說梁家騮李國麟
立法會議員兼香港護士協會主席李國麟與高永文尋日同台分享運動樂趣，結果火花四濺。李國麟話，喺立法會做得最多嘅就係「行來行去」，（拉布時）一點人數就行返入去，如果帶個計步器分分鐘日行萬步喎！高永文即刻反寸話：「你唔好為拉布辯護喎！」又問李國麟係咪「拉布」拉到悶，就出去行吓？
高永文接受傳媒訪問時繼續採取攻勢，話近排落區宣傳政改，留意到大部分市民都希望通過方案，只有兩、三成唔支持，所以要游說梁家騮同李國麟成全大部分市民期望，遲啲會約佢哋見面喎！
卓妮