咩叫衰開有條路？香港郵政就係樣辦嘞。郵政管理混亂，平時內部醜聞不絕於耳唔在講，家陣仲丟架丟到出街，郵品設計錯到離晒譜，獻禮變成獻醜，淪為國際笑柄，正一唔衰攞嚟衰。
係咁嘅，香港郵政早排推出「基本法頒布二十五周年」紀念郵票小全張，有細心嘅東網讀者發現，呢套紀念郵票竟然出現嚴重甩漏，至少有三個著名景點標錯咗。呢，本來位於灣仔嘅金紫荊廣場，無喇喇被「搬」咗去柴灣。你話嘞，一個喺港島中，一個喺港島東，幼稚園小朋友都識分喇，香港郵政居然馮京當馬涼，唔怪得成日畀人投訴擺烏龍派錯信咯。
更離譜都仲有。係人都知，聞名海內外嘅天壇大佛坐落喺東涌昂坪，但小全張無情白事將大佛「搬」咗去大東山附近。喂，香港郵政唔係導人向佛，而係導人步入歧途，你話係咪佛都有火吖！咁都未算，原本喺附近嘅昂坪纜車總站同樣難逃「被迫遷」厄運，「搬」咗去紅花顏附近，纜車路線亦「被改道」，同原來軌道根本兩回事，你話係咪靠害吖。
講開又講，香港郵政好似搬開有鋪癮咁，係又搬唔係又搬，一套紀念郵票已經「搬」咗三次，問你服未！之但係，應該搬嘅，佢哋就一於少理，賴死唔走。呢，位於中環黃金地段嘅中環郵政總局，坐擁無敵海景，估計地價高達二百億元，用嚟做郵局簡直係暴殄天物，早就應該搬啦。港府五年前撥出九龍灣一幅地皮，將中環總局同紅磡灣國際郵件中心合併重置。郵件中心舊年已經落成啟用，但香港郵政就諸多藉口唔肯搬，拖得就拖，賴得就賴，生人霸靚地，係都要做「最牛釘子戶」 。
講起嚟真係搞笑，香港郵政話喎，呢套「基本法頒布二十五周年」紀念郵票，以插畫形式介紹《基本法》實施後，香港喺唔同方面，同國家嘅緊密關係。話時話嘞，咁有紀念意義嘅郵品，付印之前更加應該打醒十二分精神核對清楚，避免出錯至係，家陣竟然搞出地理位置張冠李戴咁低級嘅錯誤，仲要五星旗區旗左右對調，點止荒唐，直頭別有用心搞破壞喇。
可能有人會問，堂堂香港郵政，因乜解究甩甩漏漏，服務質素每況愈下，撞板多過食飯呀？鬼咩，香港郵政冇嘢叻，最叻不務正業，派郵件唔睇門牌，印郵票撈亂位置，一味失信於民，講到充當政治打手咯喎，佢哋就熟門熟路，入型入格。計功夫茶話齋，呢個「醜聞專業戶」都係早摺早着，無謂戙喺度篤眼篤鼻，浪費公帑喇！