立法會議員王國興前日喺直播節目中，兩度叫學民思潮發言人黎汶洛「收皮啦你！」而被網民聲討，但佢辯稱「收皮」只係俚語，點都唔肯道歉或收回言論，仲拉埋梁國雄（長毛）落水，指長毛都試過叫官員「收皮」喎。
不過，專門研究中文俗語嘅次文化堂社長彭志銘解釋，「收皮」係上一代賭坊嘅術語，雖然唔涉及性，唔算粗口，但係下三流嘅人先會講，質疑王國興叫人「收皮」叫得咁流利，可能係好下三流嘅人喎！彭志銘仲話，王國興咁講不但有失身份，更加教壞細路，建議可以用「收聲」或「收嗲」代替，因為「收皮」仲有「叫人去死」嘅意味。唔知王國興會唔會聽專家講，就咁收聲呢？
