政情：嶺大粗口歌風波 「堯」望拉人
嶺南大學日前邀請樂隊喺校園音樂會上大唱針對警隊嘅粗口歌，搞到滿城風雨，嶺大校董會前主席陳智思喺第一時間代表校方道歉，已經夠晒冇厘頭，尋日輪到前律師會會長何君堯（Junius）以新界關注大聯盟成員身份抽水，唔止要求禁播呢首粗口歌，仲話唔排除報警要求警方引用《公安條例》拘捕唱粗口歌嘅樂隊。講到起，甚至要求立即解散嶺大學生會，甚至整頓校方管理層咁話，真係玩得好大囉！
藍爺稱事件「震驚亞洲」
Junius拉埋民政事務局前局長藍鴻震（藍爺）一齊見傳媒，兩人一搭一唱，好認真咁款。藍爺仲好火氣，形容嶺大風波已經「震驚全港、震驚亞洲」，鬧爆樂隊喺校園唱粗口歌邊係學術自由，「全世界都無咁嘅學術自由！」其實校方已經證實樂隊成員唔係該校學生，而粗口歌喺香港以至世界各地都係次文化嘅一種，講句粗口就要報警拉人坐監，警方咪好唔得閒？