政情：立會議席 梁君彥坐足16年？
立法會選舉明年登場，唔止政黨已磨拳擦掌，唔少功能界別亦開始出現爭位戰。好似已經做第三屆工業界（一）代表嘅梁君彥（Andrew），早前有傳工業總會（工總）內部有人不滿佢霸住個位太耐，要求換人。不過工總主席劉展灝（Stanley）就好撐Andrew，佢話工總無明文規定議員只可做三屆，Andrew現時表現非常稱職，睇唔到有換人需要喎。Stanley講得咁出面，睇怕Andrew來屆都坐定粒六，可安心過足十六年議員生涯囉！
隨時變立會主席熱門
四大傳統商會喺立法會都有代表，有啲商會爭崩頭，亦有啲商會可以協調成功。好似工總嘅代表Andrew，不經不覺已做咗十一年議員，有傳工總內部有聲音要求換人。尋日我哋見到Stanley，於是同佢求證。Stanley就話，雖然Andrew做咗議員一段時間，但唔需要換人住，佢認為Andrew身為內務委員會主席，表現受各方讚賞，如果佢有意爭取連任，相信工總會員都會撐佢。
既然主席都開口力撐，Andrew應該可以安全過下一關喇！我哋問Andrew係咪有意連任，佢就話千祈唔好咁講，自己暫時無諗選舉，只想疊埋心水做好目前工作喎。
其實如果Andrew成功連任，將會係立法會主席熱門人選，之不過依家立法會郁親就「拉布」，到時「剪布」重任落喺Andrew身上，絕對唔易應付，隨時被泛民建制夾擊，認真吃力不討好。
CEO過檔 劉展灝頭痛
雖然工總立法會代表多年不變，但係行政總裁職位就一波三折，曾任高官嘅現任行政總裁蘇家碧（Linda）九月會過檔港鐵做公司事務總監。Linda話，今次真係「無縫交接」，因為佢離開工總翌日就會去港鐵返工，一日假都無得放，因為佢仲有好多工作要跟進，港鐵又想佢盡快返工，惟有唔放假「工接工」。
記得兩年幾前，為咗等Linda過咗高官就業嘅「冷河期」，時任工總主席鍾志平同埋副主席Stanley要輪流替更做埋行政總裁，十分有誠意，點知咁快就又要搵人，難怪Stanley都好頭痛。佢話工總曾經想挽留Linda，但工總出唔起港鐵開嘅幾百萬年薪，無奈要放佢走。未來會否再招聘前高官做總裁？Stanley就話，想當然咁想，但前高官渴市又搶手，好易被人撬走。言下之意，似乎仲未驚夠喎！