中環出更：博愛人才濟濟新主席要省招牌
博愛醫院董事局早前喺尖沙咀一間酒店舉行就職典禮，今屆董事局人數爆晒燈，多達四十人上限，名副其實係人才濟濟。接莊做主席嘅譚姜美珠（Winnie）見到場面咁墟冚，開心笑晒。Winnie話，好多想加入嘅人無奈被拒諸門外，希望今屆董事局再做好啲，省靚博愛個招牌，以吸引有心人士共振善業。
今屆新丁總理多達十幾人，其中有唔少靚女，包括善德基金會副主席蕭何元鳳及女兒蕭潔嵐，仲有博愛前主席藍國慶太太藍王雲仙（Mina）。
靚女新總理 拍住做善事
Mina笑笑口話，佢同Winnie相識多年，所以今屆加入博愛力撐，仲做埋籌募委員會成員，希望拍住副主席兼籌募委員會主席李柏成（Jim），齊齊發力「吸水」。當日獲頒「積極參與獎」嘅Jim話，今年將全面鼓勵董事局成員幫手籌款，佢亦會喺唔同範疇出多啲力。
卓妮轉頭見到第一副主席陳李妮神采飛揚，佢話啱啱去完美國打理地產生意返港，過兩日又要飛去北京，認真頻撲，難得佢愈忙愈精神。
講起未來大計，Winnie話今屆重中之重係跟進興建全港最大型長者安老院一事，依家院方已初步訂立興建安老院舍方案。此外，博愛旗下美孚長者中心申請擴建為長者日間護理中心，為未能入住安老院嘅長者及家人提供協助，佢希望任內可成功推動計劃，咁就功德圓滿喇！
卓妮