有人話審計報告好比照妖鏡，一啲都冇講錯。呢，最新一份審計報告又揭發政府部門嘅施政亂象，簡直五花八門，無奇不有。「東方報業民意調查」顯示，受訪者一面倒批評官僚惡習積重難返，完全冇急市民所急，令人失望。
今次被審計署點名炮轟嘅部門多到好似水蛇春咁長，先講吓年年榜上有名嘅食環署吖，該署轄下嘅熟食小販市場被揭發平均空置率超過六成，一百四十四個丟空檔位中近八成養蚊超過十年，最嚴重嘅仲長達二十九年添，簡直匪夷所思。咁仲唔止，九個設於臨時用地嘅熟食市場，居然足足「臨時」咗三、四十年咁耐，仲有冇誇張啲吖。
食環署寧願將地皮丟空養蚊，都唔肯騰空地皮另謀發展，市民梗係嬲喇。「東方報業民意調查」顯示，三成五受訪者直斥官僚無適時檢討用地；三成一炮轟浪費土地資源；兩成六批評懶理問題，得過且過。咁又係呀，呢頭政府拓土建屋寸步難行，成日呻地從何來，嗰頭食環署生人霸死地，浪費資源，點止敗家咁簡單，直情製造民憤吖。
混帳部門仲有屋宇署。審計署踢爆，屋宇署任由六萬八千多份清拆令未有業主遵從，當中逾兩成已發出六至十年，最嚴重個案甚至長達三十年。更離譜嘅係，四千五百多宗「須優先取締」僭建物舉報個案中，屋宇署喺完成視察六個月至五年後都未發出清拆令，如果咁都唔係懶得就懶、蛇得就蛇，都冇人信吖。一句講晒，僭建四面開花，問題愈演愈烈，搞到屋宇安全事故不絕如縷，原因就係屋宇署官老爺懶懶閒、食塞米，助長歪風。調查顯示，四成受訪者直指如無牙老虎，拖得就拖；兩成九批評執法不力；兩成四直斥僭建物如計時炸彈。
飛行服務隊一樣唔好得幾多咋，當局○九年批出近八億元畀飛行服務隊購買兩架定翼機，點不知好事多磨，因為飛行試驗出問題，承辦商拖到今年年底先可以交付首架飛機，唔止嘥錢嘥時間，仲影響救援服務。至於勞工處亦不遑多讓，被踢爆接獲近十五萬宗僱員工傷及職業病嘅補償申索中，仍有唔少未解決，當中近九百宗足足拖咗最少三年。難為勞工處口口聲聲保障勞工權益喎，工人之友喎，簡直唔知醜字點寫。
最令人火滾嘅係，審計報告年年炮轟，官僚意見接受，態度照舊，問題冇解決，反而不斷惡化添。所以話啫，港府施政頭頭碰着黑，根源係官僚無能兼混帳，結果授人以柄。港府民望好似王小二過年，一年差過一年，完全係自己攞嚟！