政情：阿王開火 叫學汶收皮
二○一七年特首普選方案曝光不足一周，泛民主派同建制派陣營已經全面開火，繼前日港府高官落區宣傳政改時，有反對市民同學生舉起粗口手勢，尋日輪到工聯會議員王國興（阿王）於直播節目中連環開火轟泛民同學生團體，對於學民思潮發言人黎汶洛質疑出賣工人權益時，阿王先後兩度回敬對方「收皮」，其後又狠批工黨等泛民政黨收取黑金，直言「收錢做嘢點樣撬票」，認真係火力十足。
港台節目《城市論壇》尋日如常於電視同電台直播，四名獲邀嘉賓討論最新出爐嘅政改方案，其中要數最重火藥味時刻，必定係阿王同黎汶洛嘅唇槍舌劍。話說當時眾嘉賓激辯提名委員會制度時，黎汶洛突然出招批評身為工人領袖嘅阿王出賣工人權益，因現有選舉委員會勞工界別嘅選民基礎只係得九千幾人，而工聯會會員就有三十六萬人，質疑阿王點解唔為工人發聲。
指幸有提委會可質問「阿婆」
王國興立即反駁指，學民同學聯均冇代表性，仲大叫「你雙重標準，收皮啦！」黎汶洛亦不甘示弱，即時反問阿王指，「你講乜呀你？道歉呀！」殊不知，阿王再度挑機直言，「你雙重標準，收皮啦！」此時節目主持謝志峰出面調停，指阿王用詞不當，阿王立即澄清「收皮」係「俚語」。
除咗學生團體，阿王亦炮轟泛民議員，多次展示《泛民收錢實錄》書籍，痛斥民主黨、公民黨及工黨等都有議員收取黑金，直斥「收錢做嘢點撬票？」，所以通過政改好困難。佢又提及，好在有提委會存在，先可以質問有機會出選嘅「民主阿婆」前政務司司長陳方安生有冇收黑金，以及公民黨余若薇同壹傳媒集團前主席黎智英嘅關係。
其實王國興咁落力炮轟泛民，加上過去多年反拉布形象深入民心，有分析指可能係為咗未來嘅選舉鋪路，事關有傳阿王所屬嘅港島區，二○一六年立法會選舉會原本七席，減一席至只有六席，於二○一二年選舉末席入局嘅阿王自然受影響，加上另有傳聞佢要轉戰超級區議會議席，更加要有出位言論增加知名度，為日後殺出一條血路鋪路。
不過話說回頭，「收皮」一詞始終較為粗鄙，阿王於直播節目中先後兩次講到，如果有人投訴港台未有做好把關工作，即對粗口或粗俗字眼「嘟」嘅話，到時分分鐘要負責嘅係港台，而非阿王本人。