政情：中環出更：滙豐傳「浪子回頭」政商界期盼

王國強手持唔少滙控股票。

王國強林建康 讚香港好地方

沙田馬場尋日舉行名錶盃賽，吸引一批名人入場湊熱鬧，卓妮見到廣東社團總會永遠榮譽會長王國強（KK）同愛沙尼亞駐港名譽領事林建康，講開滙豐傳遷冊回港，佢哋二人均指香港一定係有好嘅地方，先吸引到滙豐遷冊回港，加上兩人都係由滙豐四十幾元到百幾元價位時都有入貨，供股亦有，不過都係長擺收息。當問及當年滙豐遷冊英國嘅做法係咪做錯，林建康就笑笑口話，好多人都係咁諗，梗係返家鄉好，浪子回頭喎！

同場嘅仁濟醫院副主席王賢訊話，大牛市下各種消息同猜測都可能會有，但佢認為，如滙豐真係將總部撤離英國係好事，而喺整個大環境同北水帶動下，佢相信好多內地概念股值得留意，畀佢揀就未必只係留意呢一間公司喇。

梁高美懿不評論滙豐係咪將總部搬回香港嘅消息，但以小股東角度睇絕對係好事。（溫國佳攝）	林建康指滙豐總部回港係好事。	王賢訊認為，有好多內地概念股值得留意。