古人話，一失足成千古恨。今時今日嘅香港，道路陷阱多多，梗有一個喺左近，一個唔好彩失足踏空，點止千古恨咁簡單，直情唔死一身潺。
唔係講笑，居於天水圍嘅梁女士早前由天耀路行人天橋前往港鐵站，點知一踏出天橋口啫，突然兩腳踏空，眼前一黑，跌咗落坑渠，右腳嚴重扭傷。嗱，呢啲咪就係道路陷阱囉，坑渠蓋移位，路政署居然關人個關，你話係咪大整蠱吖？
事發後，路政署煞有介事派員維修，仲拍心口保證唔會再有下次。點知一個月後梁女士再途經上址，發現渠蓋依然移位，同之前根本冇分別。有區議員踢爆，路政署所謂嘅維修，不過係求其搵條索帶綁住個渠蓋，後來仲懶到連綁索帶都慳番，唔怪得周不時有市民受害喇。
本報記者實地視察發現，涉事渠蓋之所以出現移位，係因為其中一角欠缺承托力，另一角又因為渠邊石屎脫落而無法穩妥擺放。正如專家話齋，崩缺嘅石屎必須填補，求其搵條索帶綁住，根本唔係辦法。好嘞，事件經本報揭露後，路政署終於知衰，急急派人補鑊，渠蓋終於「重回正軌」。唔怪得有人話，港產官僚係四方木，唔踢唔識郁。
話時話，粵語殘片《飛哥跌落坑渠》就話搞笑啫，現實中行人跌落坑渠可大可小，一啲都唔好笑。河北有一位高考女生失足跌落坑渠，溺水身亡；深圳前年亦有六個人行行吓街跌落地洞，因此產生「走路死」呢個新名詞添。至於香港咯喎，行人跌落坑渠更加唔係新聞，近年荃灣、觀塘、西環多區都發生過。除咗坑渠之外，去年銅鑼灣渣甸街行人路出現路陷，有人無端端跌落四米深地洞，執番條命算好彩喇。
香港危機四伏，都市陷阱防不勝防，仲好意思自稱係國際大都會，簡直唔知醜字點寫。講到尾，如果唔係路政官僚做嘢求求其其，是是但但，罔顧市民安全，又點會有咁多道路陷阱吖？市民又使乜提心吊膽吖？再咁落去，香港出現「走路死」一啲都唔出奇。
所以話，港產官僚無能，搞到香港唔係塌樹就係塌樓，唔係冧招牌就係高空擲物，直情係一步一驚心。計功夫茶話齋，今時今日想出入平安，行騎樓戴頭盔係唔夠，仲要識輕功水上飄至得。