政情：仇曼瑩姊弟 鑽研飛機餐
飲食業除咗長期難請人，要留住食客，少啲新意都唔得。面對租金高企，想突圍一定要搞搞新意思，米芝蓮食府新斗記品牌總監仇曼瑩（Karen）及弟弟兼公司董事仇祖薰（Jonathan）雙劍合璧拍住上，家姐負責煮，弟弟就試食，把握每個機會鑽研及發掘新菜式，本月起佢哋仲會與港龍航空合作推出飛機餐，將中式美食帶上三萬呎高空。
從事飲食業嘅Karen，對烹飪亦好有興趣，縱然工作繁忙，在家時間唔多，但每逢周末佢都會親自下廚煮意大利菜，媽媽就熱愛煮上海菜，互相交流，弟弟同爸爸則負責食，相當有口福。佢哋一家仲不時旅行搵靈感，每去到一個地方都會對當地食物特別留意，好似對上一次去泰國，佢哋就特地向當地廚師偷師，請教烹調地道菜嘅秘訣。
至於弟弟Jonathan則有着特別敏感嘅味蕾，加上佢哋食慣咗自己店舖嘅食品，平日佢會定期與朋友落唔同分店辣更，扮食客叫餸食，通常一試就知道味道有冇偏差，又會研究方法不斷提升食物水準。