政情：鄉委撐連任 發叔憂高齡
新界鄉議局正、副主席六月換屆，一直盛傳主席劉皇發（發叔）會再次連任，而廈村鄉委會主席鄧勵東就趁尋日舉行執委會會議，提早成兩個月呼籲聯署支持發叔連任。不過，發叔多謝大家好意之餘，自言已年近八十歲，擔心身體未必撐得住，叫大家「畀啲時間我考慮吓啦！」
我哋追問發叔仲有咩要考慮，健步如飛嘅發叔只係重申下月先「扑錘」決定係咪響應鄉紳呼籲，競逐連任。至於被指係潛在對手嘅副主席張學明，亦同另一副主席林偉強及全場執委舉手和應，支持發叔連任。我哋再問張學明係咪有意同發叔爭一席位？佢斬釘截鐵咁話「點敢呀？傻嘅！」重申百分百支持發叔連任喎！上水鄉委會主席侯志強亦都話，早前同張學明喺三門仔嘅晚飯會面，純粹講私人生意，「不談政治」。