政改方案未出爐，泛民主派已就係咪企硬反對政改方案分裂，情況更趨白熱化。泛民立法會議員近日頻頻發表聯署聲明，對政改方案反對再反對，以圖箍緊自己友嘅反對票。
公民黨立法會議員湯家驊（Ronny）尋晚漏夜發表聲明，話對泛民「三日一記招、五日一聯署」嘅做法已感到非常厭倦，表明無意再加入類似聯署。睇嚟泛民嘅聯署騷唔止冇市場、惹人厭，就連自己友都頂唔順。
話說泛民將會喺今日政務司司長林鄭月娥於立法會宣讀完政改方案之後就叫口號抗議離場，並喺會議廳外再N次發表聯署聲明。
不過，Ronny就睇唔過眼，認為冇需要離場、放棄提問權利，而且覺得自己橫掂講咩都冇人信，所以就索性漏夜發出聲明表明心迹，話除非中央同泛民作出適當讓步，令多數泛民支持政改方案，否則佢必定會否決人大「八三一」框架下嘅政改方案。佢仲批評，泛民不斷聯署對解決社會嚴重撕裂毫無幫助，以後就任何聯署都唔再參與咁話。