政情：築福香港翻叮重生
潮流興環保，乜都講循環再用，估唔到連組織名字都有人翻用。話說去年扶貧委員會有份搞嘅「築福香港」，由商界同政府聯手搞咗一連串扶貧活動後，已經建立一定知名度，但搞咗幾個月就結束，之後亦無以為繼。我哋最近收到風，得悉有幾位愛國愛港人士準備成立一個「築福香港慈善基金會」（基金會），仲諗住籌款三千萬元大搞扶貧工作，唔通「築福香港」諗住添食，所以索性搞個基金長遠發展？
話想散發正能量
我哋向各方求證後，發現原來只係名字相同，但此「築福」同彼「築福」係完全無關係，亦係兩班唔同嘅人負責營運。我哋打聽到基金會其中一位創辦人係身兼港區全國人大代表嘅南旋集團主席王庭聰，佢就話呢個慈善基金會搞不同扶貧、慈善活動，主要都係想散發正能量，等個社會唔好咁分化、咁對立，同埋協助一啲弱勢社群。
基金會發起人仲有好幾位，而且來頭不小。基金會主席就係「梳化大王」敏華控股主席黃敏利，其餘八位副主席，全部係商界有頭有面人物，來自各行各業，除咗王庭聰外，仲包括現代美容主席曾裕、俊和發展集團聯席主席彭一庭、「燈芯絨大王」麗達集團主席江達可等。咁多位商界猛人突然拉隊組織基金會，仲要講明係向社會發放正能量，喺呢個政改敏感時刻有咁大動作，如果幕後無人推動都幾難成事。
稱性質唔同有註冊
被問到基金會有無獲高人喺背後「祝福」，王庭聰就笑笑口話「大家互相祝福啦」，睇怕基金會好快有大搞作，唔係咁簡單。不過，築福香港慈善基金會呢個名，咪同去年創立嘅「築福香港」一模一樣？兩件事又係搞扶貧，性質又咁相似，怕唔怕被人話抄橋呢？王庭聰就拍晒心口話唔使驚，因為兩者性質唔係完全一樣，前者只係一個活動名稱，並無註冊，而佢哋個慈善基金會就以長遠發展形式營運，而且已將名稱正式註冊喎。