港產官僚最叻事後孔明，事前廢噏。前教育局局長孫明揚，日前又禁不住寂寞跳出來撐通識科，話當年處理中史科問題上做得不好，形容當時「做錯咗」，是「一個遺憾」，應考慮將中史列作「半個必修科」。
算罷喇孫公，講多錯多！講真，你二○○七年至二○一二年做咗五年教育局局長，對教育亂象真正做咗乜嘢「修正」或建樹呢？對小班教學、教學語言、學制、政策朝令夕改，又發過多少「正義」之聲？港產官僚有幾多個有勇有謀，能獨排眾議提出有益有建設性嘅前瞻策略？又有冇「寧鳴而死，不默而生」嘅氣度？
唔使問阿貴，香港教育亂象叢生，尤其教育政策愈改愈衰，學生成績未見提高，只見江河日下；而教師敢怒不敢言，所謂「校本」，完全係「你呃人」，教師做到氣咳卻沒有「教學效果」，是誰之過？就係太多事後孔明嘅港產官僚囉！
唐末詩人沈彬《題蘇仙山》有句：「千古是非無處問，夕陽西去水東流。」有道是「成王敗寇」，在位時，理應做嘅嘢你做唔到，搞到一鑊泡，依家再嘆「做錯」，又廢噏應將中史列作「半個必修科」，咁即係點呀？
網上有個笑話──爸爸教育女兒：「你可不要被男人給騙了，男人的話你別信。」一時之間做女兒的，竟不知該不該聽爸爸的話！
孫明揚如今走出來感嘆當年「做錯咗」、有「一個遺憾」，老朽自問好似嗰位細路女咁，都唔知信唔信佢嘅「肺腑之言」？佢仲指學生有必要認識歷史，又認同過往香港過分着重講「兩制」……當年希特拉說邱吉爾是「政治家中蹩腳的軍人，軍人中蹩腳的政治家」。對於有「老油條」之稱的孫公，應是「前教育局局長中蹩腳的事後孔明，事後孔明中蹩腳的前教育局局長」！