政情:寸卿姐「入唔到國」 田少搞港獨?

被視為建制派「壞孩子」嘅自由黨立法會議員田北俊(田少),之前因為亂噏嘢,搞到連全國政協都無得做。不過,田少似乎自己唔知自己事,尋日出席電台論壇時走去寸民主黨議員劉慧卿冇得返內地,點知被卿姐寸番轉頭,認真(火羅)爆!

話說尋日論壇討論政改方案,田少講到國家今時唔同往日,叫泛民主派接受「袋住先」,佢話「八三年做《基本法》諮詢委員會成員嘅時候,身為工商界都好驚共產黨,但中國已經發展得好好,今日嘅中國又點同八三年嘅中國呢?」田少臨尾口痕寸卿姐,「不過我知道劉慧卿議員你根本入唔到國家,唔係你都可以返去睇睇!」

嘩!卿姐明明身處中國境內嘅香港特別行政區,田少咁講唔通想搞港獨?醒目嘅卿姐即時反擊:「我依家都喺國家,先生!唔好當呢度唔係國家呀你,大鑊呀你!」

認衰改口「入唔到內地」

哎呀!田少今次點都兜唔番,惟有即刻認錯,板起面、非常認真咁講:「對唔住!係入唔到內地啫。」田少出醜,連主持人謝志峰都笑佢一時漏口。

第一手消息請下載on.cc東網iPhone/iPad/Android/Windows Phone Apps