政情：財爺隨時又燒鬚！
港股進入大時代，每日過千億元成交已成為家常便飯。股市初期爆升時，財政司司長曾俊華（鬍鬚曾）就話見唔到有泡沫，令投資者有信心入市。點知佢尋日忽然改口，話上周五晚即月期指下跌七百點，再加上電視台重播經典劇集《大時代》，相信「丁蟹效應」下，預計今日股市好可能會裂口低開喎。話口未完，人民銀行尋日就宣布下調人民幣存款準備金率一個百分點，即係擺明托市，令鬍鬚曾隨時又估錯嘢。
又話冇泡沫 又叫防「丁蟹」
鬍鬚曾尋日網誌以「大時代」為題，話港股過去八個成交日合共推高恒指二千四百幾點，每日平均成交額超過二千三百億元，單日成交額更試過逾二千九百億元，但上周五晚上即月期指下跌七百點，估計今日港股好可能裂口低開，而未來一段時間，股市仲有大幅波動嘅風險添！港股最初爆升時，鬍鬚曾幫股市打過一支強心針，話目前睇唔到有任何泡沫，但估唔到咁快就轉晒口風。
之後鬍鬚曾就入正題大談「丁蟹效應」，佢話市場累積相當升幅後出現調整，只係遲早嘅問題，咁啱電視台揀正喺港股急升後重播《大時代》，相信應驗「丁蟹效應」嘅機會自然較高，所以並非相信「秋官有特異功能」。佢又話，喺市場氣氛熾熱時，樂見電視台重播《大時代》，因為「丁蟹效應」有助提醒小股民注意風險喎。鬍鬚曾一時話升市冇泡沫，一時又叫小心「丁蟹效應」，真係令市民無所適從。
政改將出爐 走入「大時代」
鬍鬚曾除咗形容港股進入大時代，香港政治環境都進入大時代，因為今個星期政府即將公布政改具體方案，佢再次游說泛民主派支持政改方案，通過後市民先有機會透過「白票」對選舉制度同候選人表達不滿。不過，立法會要如期表決政改，首先預算案拉布要盡快結束，佢希望拉布議員拿出勇氣撤回三千九百多項修訂，等議會恢復正常運作。