正所謂，金玉其外，敗絮其中。咪睇香港係富裕城市、國際都會，查實只係表面風光嘅咋，唔少人焗住要瞓街、天橋、隧道、街邊……幾乎諗得出嘅地方都被露宿者攻陷，影響市容及衞生仲係其次，消防隱患多多至係大件事。
呢，話口未完就嚟嘞。深水埗欽州街西行人天橋尋日凌晨發生火警，四間露宿者嘅板間房被焚毀。當時有住客喺睡夢中聽到有人嗌火燭，轉個頭已經見到火光熊熊，事後現場所見，天橋部分被燒到黑晒，可見火勢幾咁猛烈，今次冇人傷亡，都算不幸中之大幸咯。消防調查後認為火警有可疑，已轉交警方作縱火案處理喎。
今次火燭到底有咩內情，仲要查過至知，但露宿者問題不斷惡化，再唔諗辦法解決，遲早又出事咋。本報早排視察全港各區，發現露宿者之家遍地開花，梗有一間喺左近，好似今次涉事嘅行人天橋咁，大大話話住咗二十幾戶人，都咪話唔誇張。呢啲天橋屋設備齊全o架，睡床、梳化、衣櫃應有盡有，有啲仲用帆布搭起屋頂，擺明長期居留。
其實，露宿者聚居地危機四伏，點止消防隱患咁簡單吖。係人都知，露宿者品流複雜，對附近居民造成極大滋擾。北角英皇道行人天橋早前發生露宿者挾持人質事件，當時有人警告，如果當局繼續坐視不理，聽之任之，遲早出事，結果不幸而言中。
國際都會淪為露宿天堂，港產官僚實在難辭其咎。正如有地區人士話齋，當局規劃失當，行人設施重複建設，搞到唔少設施淪為「廢橋」、「廢隧道」，露宿者仲唔乘虛而入咩。有區議員曾向當局反映問題，點知社署、屋宇署、房署、地政總署等衙門你推我讓，互相卸責，冇人肯接呢個燙手山芋。最離譜嘅係，當局淨係識驅趕露宿者，做場大龍鳳交功課，事後關人個關，既唔安排上樓，亦冇作出跟進，等於將露宿者趕去其他地方，根本解決唔到問題。
正所謂，有頭髮冇人想做瘌痢，有屋住邊個會流落街頭吖。依家嘅問題係，私樓租金貴不可攀，公屋輪候又大排長龍，上樓談何容易吖。社署數字顯示，登記露宿者近三年由五百多人增加至七百多人，但獲安置公屋嘅得三十六人咁大把。所以話，露宿者問題其實就係房屋問題嘅縮影。
富者田連阡陌，貧無立錐之地，呢一幕出現喺香港，既係港人嘅悲哀，更係港府嘅恥辱。官僚無能，市民連安居都成為奢望，你話係咪無奈吖！