行政會議兼立法會議員葉劉淑儀喺日前撰寫嘅專欄文章《跳樓慘案反映另類外傭問題》中提到，曾經收到投訴話有女傭勾引男戶主，佢就喺社交網站上載有關文章，仲圖文並茂標示「大量菲傭為外國男士提供性服務？」。點知篇文章就引起外傭權益組織關注，批評葉劉涉種族歧視，甚至要求菲律賓將葉劉列入「不受歡迎外國人」黑名單，禁止佢入境。葉劉死撐咗一輪後終於貼文「耍冧」，話配圖引起公眾對文章內容嘅誤解深表歉意。
葉劉前日已經喺社交網站刪除有關文章同配圖，但就冇道歉，之後再喺網站話有關文章所用嘅配圖極不恰當，有誤導公眾之嫌，佢得悉後已經立即通知助理刪除相關配圖。佢仲話，該篇文章旨在反映社會實況，絕無帶有半點種族歧視或標籤菲籍傭工為性工作者之意，對於配圖引起公眾對有關文章內容嘅誤解，佢深表歉意，日後喺審閱配圖及內容時定必加倍小心，並會對該部門主管作出適當嘅處理喎。
葉劉喺農曆大年初二到車公廟出席活動時被舞麒麟撞飛後，堪輿學家麥玲玲已預期葉劉喺羊年「全年黑過鬼」，會多阻滯及麻煩，要小心說話及口舌是非，適宜低調行事，勿鋒芒太露，點知真係畀佢開口中。