政情：靚女準醫生 幾忙都盡公民責任
聯合醫院日前揭發假醫生事件，無論醫護人員定病人家屬都人心惶惶，擔心公立醫院保安制度同病人權益受到威脅。咁啱尋日舉行一個優秀青年嘉許禮，本身讀緊中大醫學院二年級嘅十大優秀青年馮冬怡話，想做醫生有好多唔同方法，但就唔係着一件白袍上身咁簡單，從事醫護行業係同人嘅生命有關。
膺十大優秀青年
馮冬怡從小就立志成為醫生，成功入讀醫學院後，亦積極推動醫護界嘅後生仔籌組「杏林仁」，宣揚醫療知識同健康生活。佢希望成員以知識回饋社會，為有需要嘅人提供醫療服務，做醫生果然唔係單靠着白袍咁簡單！除咗醫療，冬怡亦係「黃大仙區青年發展網絡」嘅核心小組成員，亦擔任社區藝術表演組織「心聲連動」嘅秘書，佢話無論讀醫幾忙都好，都要關心社會，盡公民責任。
至於星中之星嘅得主陳浩庭，雖然年僅二十五歲，但已經成為見習律師同調解員。佢由二十歲開始就擔任多項公職，分分鐘係年輕公職王，但佢話目前最想拎到專業資格先，第日有機會再考慮喺其他崗位服務社會咁話。