政情：搶研「聰明城市」 帆心繫選舉？
今年施政報告提出將九龍東打造成「聰明城市（Smart City）」，雖然政府暫時仲喺研究階段，十畫都未有一撇，但立法會議員葛珮帆（EQ）就搶閘成立咗一個「聰明城市專家小組」，日前仲舉行咗首次圓桌會議兼出埋新聞稿，列明邀請咗各行業嘅專家，十足政府委任委員會咁款。莫非EQ想騎劫政府「聰明城市」計劃，去幫自己嚟緊嘅區議會同立法會選舉造勢？
會議請埋發展局官員
施政報告提出研究以九龍東為試點發展「聰明城市」嘅可行性，預計「聰明城市」範圍會涵蓋啟德、九龍灣及觀塘，明年底就會有具體建議同優次措施。不過，EQ日前就搶先成立咗一個「聰明城市專家小組」，上周四已經開咗首次嘅圓桌會議，仲邀請咗發展局副局長馬紹祥等官員出席。
EQ就話，發展聰明城市係世界性趨勢，香港都需要引入相關概念同科技，以提升市民嘅生活質素同政府管治水平。
廣邀專家 變iProA翻版
不過，細看呢個「聰明城市專家小組」嘅組成，雖然話係廣邀工程、科技、城市規劃及智能運輸等唔同範疇嘅專家，但當中其實唔少成員都係來自由EQ成立嘅互聯網專業協會（iProA），而且仲係iProA嘅骨幹成員，所以個專家小組幾乎可以話係iProA嘅翻版。而呢個專家小組就由EQ同iProA前會長鄧淑明擔任聯席主席，專家小組其他成員就包括iProA現任會長洪為民、副會長鄭松岩及副秘書長楊文銳。
「聰明城市專家小組」除咗成員好多都係iProA嘅人，佢哋向傳媒發出嘅新聞稿格式都可以話係抄足政府過往公布委員會委任名單時嘅新聞稿格式，新聞稿行先，再列出小組主席以及小組成員名單，加上連馬紹祥都出席佢哋嘅首次會議，唔知仲以為政府委任咗佢哋負責九龍東「聰明城市」嘅研究工作。