中環出更：周浩鼎東涌拉票 中英文兼備
區議會委任制將於十一月區議會選舉後正式壽終正寢，謀求轉換「跑道」參與直選嘅有民建聯（民記）離島委任區議員周浩鼎（Holden）。Holden笑言，東涌既有公屋、居屋人口，仲有唔少外籍人士聚居嘅中產屋苑，地區議題都因應居民背景而各有取向。唔單止咁，佢落區宣傳不但要印齊中、英文傳單張，仲要不時雙語廣播，喺民記精通雙語極為罕有。未參選已經要爭取外籍人士支持，睇嚟佢要學識「人格分裂」至掂。
成日落區 唔驚傘兵
由委任轉打直選，Holden其中一個考慮嘅落腳點包括民建聯黨友周轉香嘅東涌南選區，呢區公民黨過去兩次嘗試插旗都敗北，本身係律師嘅Holden除咗兼備專業形象，亦係新鮮出爐嘅民建聯副主席，相信有助鞏固建制派票源。不過，該區亦係泛民「傘兵」嘅落腳點，佢哋更以反對「三跑」為號召，明顯係衝住支持方案嘅Holden而來。不過，Holden自言每周落區四日，閒閒地「打躉」半日，地區工作扎實，唔驚任何「傘兵」來襲，但就要犧牲陪下月滿一歲嘅囝囝親子時間喇。
卓妮