中環出更：楊立門樂做無糧歌手
由樂施會舉辦、一年一度嘅「樂施音樂馬拉松」已經踏入第二十五個年頭，尋日開幕禮更邀請「AO（政務官）歌王」民政事務局前常任秘書長楊立門（Raymond）夥拍著名音樂人趙增熹擔任壓軸表演嘉賓，掀起開幕禮高潮。Raymond退休後頻頻出騷，唔通冇人撬佢過檔幫手？佢笑言政府嘅「過冷河」制度相當嚴謹，退休後首年幾乎咩都唔做得，與其坐喺屋企，佢樂意唔收分文，為慈善做無「糧」歌手。
講起「過冷河」，曾任民政事務局副秘書長嘅樂施會總裁余志穩（阿魚）肯定感同身受。佢透露，雖然已經離開政府六年，但加入樂施會前過咗三年「冷河期」避免延後利益嫌疑，而「過冷河」期間曾經獲港大邀請授課，雖然兩堂講課只係象徵式收五千元車馬費，但佢向政府申請都要足足半年先獲批准，而港大課程未等得切政府批准已經上完堂喇！
阿魚未言休 重返融樂會
加入樂施會三年，阿魚亦將會於八月離開樂施會，重返專注服務少數族裔嘅融樂會做義工。阿魚笑言，時任民政局副秘時專責《種族歧視條例》立法工作，同相關團體交手多年，正式退休後返去幫手都好順理成章。不過，阿魚笑言睇見Raymond退休後依然咁Fit，都開始後悔點解當年冇學到唱歌呢？
講返Raymond再度夥拍趙增熹上台，喺趙增熹鋼琴伴奏下獻唱經典金曲《Greatest Love of All》同《獅子山下》，博得全場掌聲。兩人上月先合作舉行演唱會為健康快車籌款，再次碰頭繼續互笠高帽，趙增熹大讚Raymond歌喉達到「職業水準」，唱得好過好多歌手喎。
卓妮