政情：「師姐」加盟新民黨 葉劉陶醉
一向不乏高官加入嘅新民黨又再有前高官新血。黨主席葉劉淑儀尋日喺社交網站透露，喺周年會員大會前幾日，得悉其「師姐」兼房屋署前副署長鍾麗幗將會入黨。會員大會當日，已係黨員嘅郵政署前署長譚榮邦亦有現身，三名前高官仲影咗張合照，認真難得。
房署前副署長
房屋署前副署長鍾麗幗喺○五年離開官場後，即加入恒基地產旗下嘅香港小輪出任發展部董事，現時任職恒基地產集團高級顧問，據聞本月底退休。我哋問過葉劉，佢話鍾係主動加入，難得對方咁賞識梗開心，仲話「畀我自我陶醉吓都得啩」。
葉劉仲話，鍾係資深公務員，雖未曾共事過，但過往喺公務員協會都經常見面，仲謙稱自己係「師妹」添，唔知佢將來會否聽晒「師姐」話呢？