政情：政改會否轉軚 泛民疑開賭盤

政壇老手真失策

白鴿黨尋日喺社交網站上載咗一幅叫做「男人的浪漫，晒冷五十萬」嘅《賭神》電影海報改圖，白鴿黨中委會成員李永達（高達）個頭被key到「賭神」周潤發身上，改圖仲寫明「李永達開盤50萬、賭民主黨不轉軚」添。雖然網上有唔少人讚好，但該黨同高達原來已經喺不知不覺間誤墮法網！

我哋問過同屬白鴿黨嘅黃大仙區議員、律師黃國桐，佢話透過網絡聲稱開盤有機會觸犯《賭博條例》，「首先要界定係唔係賭博，民主黨轉唔轉軚，係你控制唔到嘅，可以開大亦可以開細，預計唔到，所以有博彩成分。」黃國桐補充，「如果開盤嘅人只係口講口賠，之後辯稱『係吹水啫，都無涉及金錢交易』或者承認係『講大咗』，咁就唔算犯法。」不過，高達事後似乎未有清楚講明係咪吹水或講大咗。

高達係政壇老手，點解咁失策呢？睇番事件嘅始末，原來係社民連陶君行（阿陶）早前喺網上電台聲稱要開一個二十萬元嘅賭盤，賭白鴿黨唔會「轉軚」，但最近見到白鴿黨黃成智嘅政改「袋住先」言論後，阿陶就打算想縮沙。高達見狀就誇下海口，公開開盤豪賭五十萬元，拍心口保證該黨政改立場堅定，絕不「轉軚」。究竟阿陶係咪真係要開出二十萬元嘅賭盤呢？尋晚截稿前仍未能聯絡到佢。

黨社交網未刪圖

至於係邊個咁醒目，發現個社交網站嘅貼文有問題呢？原來係白鴿黨立法會議員單仲偕（騸雞），騸雞話尋日朝早一見到有關改圖貼文就發覺好大問題，即刻叫負責嘅黨友將改圖帖文刪除。不過，直到尋晚，白鴿黨仍未刪除有關改圖貼文。