中環出更：賣複式戶連兩車位林瑞麟袋半億
樓價高企，唔少擁有自住物業嘅業主只能享受紙上富貴，但政務司前司長林瑞麟近日就出售手上物業。市場消息指，林瑞麟同家人名下嘅赤柱柏濤小築複式戶，啱啱連同兩個車位出售，售價高達五千萬元，實用呎價約二萬六千元，較十年前買入時作價一千八百萬元升值約一點八倍，即狂賺三千二百萬元。今次佢高價賣樓賺錢「袋住先」，莫非認為樓市已經見頂？
沙士後買入 實積約二千呎
林瑞麟曾經係官場出名嘅樓王，該單位係○四年四月、即沙士後嘅低位買入，實用面積約一千九百一十五方呎，屬自用物業，出售時連有租約，月租約八萬元。該單位曾成為外界焦點，事關四年前林任政制及內地事務局局長時，被踢爆住所天台有僭建帳篷及圍欄，當時林矢口否認，惟其後自爆已將上述僭建拆除。
- 林瑞麟
一二年六月底林瑞麟退任後，即到牛津大學修讀神學，自此鮮有出席公開活動。去年底本報發現林瑞麟在港行蹤時，佢嘅身形明顯消瘦，但精神唔錯。今次佢賣咗層樓，唔知係換樓定係睇淡後市呢？不過，袋住半億元咁爽，日後想點都得喇！