中環出更：土國好客 專資會籲港學嘢
受連串反水貨客行動影響，訪港內地旅客急跌，零售業叫苦連天，相對歐洲國家就落力吸客，催谷旅遊業。專業及資深行政人員協會（專資會）一眾會員，趁復活節假期暢遊土耳其，有份跟團嘅專資會理事、新華旅遊董事總經理楊章桂芝（Cindy）話，當地人待客親切，見到遊客主動交談、帶路、合照，就連街邊小販，都主動用普通話叫賣，歡樂友善嘅氣氛，值得港人好好學習。
土耳其復活團由專資會副會長吳長勝任團長，同行有極地探險家李樂詩、副會長伍翠瑤、財務長陳記煊夫婦等。遊土耳其，唔少得體驗坐熱氣球俯瞰奇石林，但自從埃及發生熱氣球意外後，土耳其嘅熱氣球駕駛員都格外小心。飛行當日忽然遇上大風，熱氣球公司下令停飛。幸好當地有天然溫泉、上百萬年嘅風化岩石，仲有挖洞而居嘅獨特風俗，團友逐一參觀，算係補番數。
轉過頭，團友拉隊參觀博物館，巧遇當地師生主動上前交談，又要求拍照留念，原來老師鼓勵學生多同遊客溝通，練習英語。
減戾氣 增景點
Cindy話，相比之下，港人似乎戾氣較多，慨嘆香港特色旅遊景點乏善可陳，有歷史故事嘅名勝又買少見少，若加上仇視遊客嘅態度，香港吸引力真係大打折扣，呼籲港府多增建旅遊景點，亦要向土耳其學習，營造開放友善旅遊氣氛至有出路。
卓妮