「頭暈去看醫生，醫生也發燒」……咪以為淨係唱歌咁唱，現實比歌詞仲荒謬呀。公共醫療百病纏身，亂象多多，醫管局班大國手能醫不自醫，你話係咪吹脹吖！
嗱，港府年前大鑼大鼓成立醫管局檢討督導委員會，話要全面改革醫管局，結果一拖再拖，「病情報告」終於有望出爐嘞。身兼委員會主席嘅食衞局局長高永文日前話喎，報告已經大致完成，最快年中提交立法會，又話諮詢期間聽到唔少意見，包括聯網資源如果唔按人口比例分配，會造成唔公平、服務輪候時間過長喎。
講真，官僚老生常談，講嚟講去三幅被，市民聽都聽到厭啦，不如聽吓醫學會點講好過喇。佢哋直指醫管局充斥山頭主義，聯網唔單止冇合作，反而為爭奪資源無所不用其極。舉個例吖，有間醫院白內障手術輪候時間縮減至零，於是提出幫輪候時間長嘅醫院分擔病人，點知被一口拒絕，原來對方係擔心病人不足會被削減資源。利用病人福祉作籌碼，仲有冇荒謬啲吖。
講到聯網間資源分配不均咯喎，有統計數據證明。以人口計，新界西聯網平均每千人得零點六個醫生咁大把，而九龍中及港島西平均每千人有一點三及一點一個醫生；仲有，部分地區擁有科室齊全及設備先進嘅醫院，部分地區只有小型診所，睇大病要跨區，可見香港點止有貧富懸殊，連醫療資源都差天共地，邊有公平可言吖。
更令人無法接受嘅係，醫管局行政架構臃腫，肥上瘦下，用於前線醫護人員嘅資源完全唔成比例，用於病人嘅就更少，結果搞到十個煲七個蓋，前線醫護做到踢晒腳，忙中出錯，事故頻生，受害咪又係病人。
一句到尾，爭奪資源只係病徵，醫管局管理混亂至係病灶所在。好嘞，家陣脈又把咗，症又斷埋，咁藥方又係咩呢？醫學會建議採取「錢跟病人走」方案，以人口比例、實際工作量等因素分配資源；醫學會更建議，聯網總監同各醫院行政總監每六年轉換一次，而醫院部門主管就改行固定任期合約制，並且唔可以連任，避免擁兵自重嘅問題。
嗱，有關建議能否根治亂象見仁見智，功夫茶淨係知道，山頭一日喺度，無論輪換制抑或合約制，爭權奪利都唔會停止。話時話，家陣已經進入資訊時代，乜都電腦化、網絡化，北美醫生都可以網上遙距幫亞洲病人做手術喇，聯網制仲有冇存在必要，真係值得檢討。
都係國家領導人講得啱︰改革到咗深水區，要敢於啃硬骨頭，作為骨科醫生嘅高局長，敢唔敢向既得利益集團開刀呢？