政情：何建宗重返「娘家」集思
前年因為冇申報家族公司喺新界古洞發展區持有地皮，最終倉皇辭職離開官場嘅發展局前政治助理何建宗，除咗任清華大學法學院訪問學者、全國港澳研究會會員，最近仲重返香港集思會，擔任總研究主任。其實何建宗入官場之前，都做過集思會首席研究主任，所以今次只係返回娘家啫。
集思會尋日發表青年人處境及訴求研究報告，訪問一千五百名十五至三十九歲青年，有三成人不滿或非常不滿社會現況，半數人支持去年佔領行動，四分之一人仲話會再參與類似事件。受訪者中最關注社會議題都係住屋，包括壓抑租金或樓價、多建公屋或居屋，提高整體房屋供應。今次報告真係開正何建宗嗰瓣，相信佢可以為集思會提供多啲土地規劃嘅意見喇。