中環出更：工記改選 會長林淑儀冧莊
工聯會（工記）領導層尋晚改選，並誕生新一屆領導層，其中林淑儀、吳秋北成功冧莊做會長同理事長；至於副會長及副理事長，除咗一班熟口熟面嘅人，好似黃國健、陳有海、潘佩璆等，亦換咗啲新面孔，新當選嘅副會長有黃國及周聯僑，副理事長就有孫名峯、陳鄧源及梁芳遠。不過，新一屆副會長同副理事長就有啲怕醜，冇乜就政策表達意見，最後由吳秋北打圓場，話香港團結一致，政制先可以繼續向前走。
對區選有信心
工記每三年就會換屆，前晚選出二十九個常務理事工會，尋晚就選出第三十六屆領導層。林淑儀對嚟緊區議會選舉似乎充滿信心，佢話上屆有三十一人當選區議員，希望今屆出選同當選嘅人都比上屆多，但具體出選人數及選區仍未敲定。
工聯會爭取標準工時多年，但立場不時受到批評，林淑儀話，佢哋喺爭取勞工權益上唔會褪軚，但同時強調爭取權益唔係打交，亦唔係上電視講兩句咁簡單，要有理有節，以及積極聽取工會意見，希望改善工時長同加班補水嘅情況。照咁睇，要成功爭取仲係來日方長。
卓妮