中環出更：神秘善長月捐仁濟百萬
仁濟醫院早前假灣仔君悅酒店舉行新一屆董事局交接典禮，卸任主席嘅蘇陳偉香交棒畀新任主席林煒珊（Vanessa）。蘇太任內共籌得逾二億元善款，創下歷史紀錄。成績咁好，原來係多得一位神秘善長以好特別嘅方式支持，講起都幾感人。
蘇陳偉香任內籌逾兩億
蘇太話，自去年五月起，董事局每個月都收到一位無名氏寄來一張一百萬元支票，用以支持醫院重建工程，至三月底已累計收到一千萬元。佢哋多次嘗試接觸呢位善心人士，但對方始終不願曝光。蘇太話，三月份呢位善長捐款倍增至二百萬元，結果令總籌款數字一舉突破兩億元，令人十分振奮。
接棒做主席嘅Vanessa笑言壓力好大，所以今年會着重推廣仁濟作為慈善企業形象。佢話爺爺林百欣有份創辦仁濟醫院，父親林建名就做過仁濟醫院主席，所以今屆輪到佢接莊，係佢人生難忘嘅一頁。今屆董事局有唔少新面孔，包括城中望族利希慎家族後人利承武，佢話係Vanessa同總理羅穎怡搵佢加入，佢好認同Vanessa嘅理念，所以就爽快答應。
鄭承峰自認股海「明燈」
近期股市牛氣沖天，仁濟第一副主席鄭承峰（Baldwin）笑稱自己係股海「明燈」，所以好少炒股。今屆佢兼任仁濟籌募委員會主席，唔知有咩「吸水」大計？Baldwin話，今年將會整合大大細細嘅籌款活動，以便節省行政支出，將善款用於實處。依家已有籌款初步諗法，但就肯定唔會投資股市喇！
卓妮