眨吓眼，第二階段膠袋徵費已經實施近兩星期，成效係點嘅呢？官老爺話喎，效果唔錯，會繼續加大力度宣傳。之不過咁，官字兩個口，事實係咪咁仲要睇過至知。「東方報業民意調查」顯示，大部分受訪者批評條例唔清晰，收費又唔設上限，搞到市民同商戶難以適從，隨時弄巧成拙。
環境局局長黃錦星係咁講嘅，第二階段膠袋徵費實施至今，發出二十宗口頭警告，主要涉及向包裝食物及電器等不獲豁免嘅產品派發膠袋等，認為情況可以接受，而且主流民意支持徵費喎。佢仲話，當局已增聘數十人定期「放蛇」，下月會正式展開檢控。
即係咁，○九年推出第一階段膠袋徵費，成功令堆填區嘅膠袋棄置量減少七成半，效果的確唔錯，為環保大局着想，將徵費範圍擴展至全港所有商店，市民亦可以理解。問題係，當局做嘢甩甩漏漏，新例存在唔少灰色地帶，難免引起爭議。例如就算麵包已用膠袋預先包裝，但如果唔係密封，市民仍可免費多取一個膠袋；又例如，濕貨可獲豁免收費，但市民同時購買濕貨及乾貨並放入同一個膠袋，商戶唔收費就會犯法。咁搞法，即係製造矛盾啫，唔怪得有商戶索性統統收費，費事誤墮陷阱。
正如「東方報業民意調查」顯示，對於法例唔清唔楚，三成九受訪者批評措施存在漏洞；三成擔心有人走法律罅逃避徵費；一成七認為環保大打折扣。市民唔係杞人憂天，有連鎖店為免流失顧客，表明會改用紙袋，或者以其他優惠方式回饋顧客。咪以為用紙袋就係環保吖，製造紙袋唔止需要伐木，又要經過漂染，而紙袋本身亦唔耐用，對環境嘅損害唔會好過膠袋幾多嘅咋。至於向顧客提供回贈優惠，更加令膠袋徵費如同虛設，盞嘥氣。
另一個爭議係，當局規定膠袋徵費最少五毫子，但不設上限，商戶收幾多都得，結果有人飛擒大咬收五蚊一個膠袋，問你服未。難怪三成七受訪者擔心無良商戶濫收費用；兩成八認為應設收費上限；兩成四直斥收費混亂。呢，有豁免收費嘅酒樓乘機將外賣盒及膠袋調高收費，就知濫收費用幾咁普遍喇，難為官老爺仲講風涼話，聲稱商戶咁做並唔犯法，叫市民自行決定幫唔幫襯喎。
再講吖，商戶毋須將徵費款項上繳政府，慳番膠袋成本之餘，仲可以增加收入，完全失去取之環保、用之環保嘅意義。所以話，港府搞環保眼高手低，獨沽一味徵費，唔怪得爭議多多喇。唔少受訪者認為徵費只係治標不治本，要求當局做好回收及源頭減廢，港產官僚收到未呀！