曾經講過以後只理民生議題嘅立法會議員湯家驊（Ronny），最近又活躍番政治議題，而且主動拉線做中間人。Ronny尋日打頭炮，搞咗場由溫和派泛民組成嘅論政平台，閉門討論香港政治出路。平台本身請咗好多政界中人同學者，但Ronny話經傳媒高度曝光，嚇怕唔少人，搞到有三分之一應邀人士突甩底，認真出師不利。
Ronny同公民黨貌合神離好耐，一直有傳佢會退黨，甚至另起爐灶。今次論政平台當然無請公民黨人，出席者來自左中右派都有，包括同民主黨貌合神離嘅狄志遠、大學學者宋恩榮、王于漸、葉健民同陳祖為等，宋同王分別係「十三學者」成員，而葉同陳就同泛民相熟。
連身兼民建聯黨員嘅香港可持續發展研究中心創辦人朱兆麟都畀面出席，政治光譜真係幾闊。不過，出席人數始終不及預期，有近三分之一人甩底，最終得十六人出席。