政情：德成遊南非舊監獄 感觸多
民政事務局局長曾德成於「六七暴動」時，因派發反殖民地傳單而入獄兩年，年多前於佔領行動前再被問及此事時更反問「何犯罪之有」。佢喺最新網誌中再次借題發揮，自爆早前曾到南非已故總統曼德拉被囚禁、位於南非羅本島嘅博物館參觀，而去年初佢喺香港更曾「憑弔」數名當年被強行囚禁，但已身故嘅愛國朋友。唔知曾德成對於數十年前因愛國入獄兩年，係咪心有不甘呢？
曾德成呢篇網誌以「博物館，功能珍貴」為題，指曼德拉當年囚房如今開放畀公眾參觀，加上博物館安排曾被囚嘅人士當導遊，形容今天前往參觀嘅遊客，或多或少都懷着崇敬之情去觀覽。佢話去年初「憑弔」數名朋友，指佢哋當年被強行囚禁喺原摩星嶺集中營，惟佢哋冇犯過傷天害理罪行，只係為咗愛國，卻被港英殖民政府不經審訊關押，而且囚房內電燈廿四小時長開，令囚房中人承受不斷受監視嘅巨大心理壓力。曾德成突然如此感觸，莫非仍對當年留有案底耿耿於懷？