政情：估一簽幾行 政黨全錯
收緊深圳戶籍居民「一簽多行」嘅政策終揭盅，結果係改為「一周一行」。香港左中右政黨一早齊齊玩買大細遊戲，提出五花八門嘅建議，包括一簽二行、一簽八行、一簽三十行、一日一行或索性取消唔使行，仲有政黨提出「一簽若干行」實行大包圍，但最終結論係冇人貼中阿爺心水。今次冇政黨可以話自己「成功爭取」，真係被玩謝喎！
政治圈一向有個不成文嘅遊戲規則，逢親政府公布新政策前，立法會議員例必第一時間搶先喺公布前提出「叫價」，如果同政府不謀而合，就當係成功爭取，開香檳慶祝啦；若然結局同叫價爭少少，就話成功逼使政府做嘢，叫做拎番個安慰獎。
過辣過鬆被通殺
一簽多行呢個議題對民生影響極大，唔止泛民提出叫價，建制派政黨都唔執輸，以免政府一旦宣布收緊，被泛民搶佔道德高地。我哋翻查過各政黨叫價，發現無一個政黨可以成功估中，最貼近呢個結果嘅要數新民黨田北辰，佢早前喺兩會期間提出收緊至「一簽三十行」。
其他政黨就輸幾條街，好似民主黨估一簽八行就太過辣。自由黨方剛就話一日一行，即係一周七行則太過寬鬆。而工聯會本來叫「一簽數行」，被人逼迫後先提出「一簽二行」，結果三大黨都「撻Q」。民建聯（民記）就以大包圍策略建議收緊至「一簽若干行」，即係開大開細開圍骰都係佢贏，但呢招咁無賴，所以唔應該當佢成功爭取。
政改都無路捉?
至於一眾本土派陣營人士，例如北區水貨客關注組梁金成、人口政策關注組譚凱邦同新民主同盟范國威，就要求取消一簽多行，叫價太高，當然被莊家通殺啦！不過佢哋志在表態，應該無諗過要成功爭取。今次「買大細」遊戲，無一個政黨成為最終大贏家，有心水清嘅政界人士就話，以往建制派通常會收到風，但今次連佢哋都估唔贏，反映到中央出手「無定向加無路捉」。照咁睇，唔知政改會唔會又係咁呢？