中環出更：上斜唔夠力 踩車吳得掂
教育局局長吳克儉有個花名叫吳得掂，估唔到佢唔止做局長唔得掂，連踩單車都唔係好掂。尋日佢出席一項單車活動時，聲稱學生時代已經踩單車，講到係威係勢，可惜當佢上斜路時就氣喘不止，臨完賽前仲踩到左搖右擺，真係技「驚」四座。
戴上頭盔嘅吳得掂初初踩得有板有眼，可惜一上斜即刻出事，唔止氣喘，仲好辛苦先爬番上平路。就快完成十三公里時，佢仲踩到左搖右擺，好似就嚟唔夠力。完成活動後，佢笑笑口同其他參賽者講，自己已經一把年紀，踩咁遠單車真係有啲辛苦喎！
早排整親右手 輪到左腳
我哋發現佢左腳貼住塊膠布，記得佢上個月啱啱整親隻右手，腫到變豬手，唔知今次又發生咩事？佢就話近排做好多運動，前晚踢波時撞正落雨，成身濕透之餘，左腳膝頭對落位置仲刮損咗。佢笑稱係小事，唔會影響踩單車咁話喎！不過奉勸吳得掂都係小心為上，佢自己都話年紀已經唔細，仲成日搞到損手爛腳，家人都擔心喇！
卓妮