「棠哥」在家休養 恐有後遺症
【本報訊】胸口捱槍傷的「收藏家」勇經理「棠哥」，目前已出院在家休養，家人擔心他會有後遺症，錶行其中一名股東昨對於槍匪落網表示：「梗係好事啦……對中槍伙記都係一個交代。」又讚揚香港警方與內地公安「好犀利」。由於兩地劫案的審訊「有排搞」，相信被劫名錶將會「新款變舊款」，會與保險公司商討賠償細節。
據悉，「棠哥」現時可行走，但身體虛弱，經常不夠氣，暫時仍然需要在家休養，未能上班，家人擔心他會有後遺症，要待觀察才可知進一步情況。事業心強的「棠哥」想盡快重返工作崗位，其中一名股東昨表示：「佢（棠哥）康復得好好，較預期康復得快，我都想佢聽日可以健健康康咁返工呀，但急唔嚟嘛，就算佢返工，都唔會畀佢做粗重嘢啦！」
錶行股東：心理輔導員工
該股東稱：「好多謝警方同內地公安，佢哋好犀利，做得好好，證明香港係一個安全嘅地方。」他又指，暫時未知起出贓物會何時還予公司，但相信會「有排搞」，如果要待審訊完畢才可取回手錶，股東相信屆時會「新款變舊款」，不諱言：「唔多唔少都會有損失！」會與保險公司商討賠償細節。至於事件對員工的心理都造成很大的影響，公司已安排心理輔導疏導職員的不安情緒。