開講有話︰伸頭係一刀，縮頭又係一刀，與其拖泥帶水，倒不如痛快了斷。
冇錯喇，功夫茶講緊嘅咪就係即將玩完嘅亞視囉。該台捲入連串欠薪風波，勞工處先後四次作出檢控，並發出超過二百張傳票，法庭尋日處理其中六十四張傳票，涉及廿一名員工合共八十萬元薪金，結果亞視被判罰款六十九萬元，創同類案件新高。最好笑嘅係，亞視代表居然向法官求情，話公司要變賣資產出糧已經「好傷」，希望從輕發落喎。可惜吖，法官完全唔畀面，直斥亞視明知營運困難，不如及早結業，點都好過勉強營運而拖欠員工薪金。
咁又係呀，港府否決續牌申請，等於判咗亞視死刑，既冇股東肯繼續注資，更搵唔到白武士打救，員工今日唔知聽日事，再做落去都冇意思喇。一間毫無出路嘅電視台，與其苟延殘喘，不如早早了斷好過。再講喇，就算亞視點樣死撐，最遲出年四月都要收工大吉，咁又何苦呢。
即係咁，亞視嘅命運已成定局，家陣嘅問題係，現有嘅頻譜點樣處理呢？港府計劃將當中嘅模擬頻譜交畀香港電台，而數碼頻譜就會交畀通訊局再行分配喎。嗱，呢啲就叫添煩添亂喇，正如有人話齋，港台一直只係負責製作節目，冇營運電視台嘅相關人才，有頻譜都冇用喇；亦有人擔心港台冇足夠節目，到頭來可能重蹈亞視覆轍，播來播去三幅被，市民一樣冇選擇。
其實，技術問題仲係其次，政治問題至係重點。港台話就話由公帑供養，實際上早就淪為反對派喉舌，港府將頻譜交畀佢哋，分分鐘自己攞嚟衰。有立法會議員就講得啱嘞，港台定位不清，編導路線偏頗，身為公營機構「食碗面反碗底」，再將亞視嘅頻譜交畀佢哋，盞更加有恃無恐嘅咋。
議員嘅擔心唔係無的放矢o架。大家有眼見，港台打住編輯自主之名，行反對政府之實，製作嘅所謂時事節目以醜化高官為樂，早就畀人批評「陰陽怪氣」。尤其係舊年嘅佔領之亂，港台更加唯恐天下不亂，一味幫反對派講說話，甚至涉嫌鼓吹違法添。咁都唔止，港台管理混亂，醜聞多多，特別係帳目不清，更加多次畀審計署踢爆。有人形容港台係針插不入、水潑不進嘅獨立王國，真係一啲都冇講錯。呢嗱，港府計劃將頻譜交畀港台，有人就打蛇隨棍上，要求增撥資源喎，最怕養肥呢隻狼狗，隨時掉番轉頭咬主人都似。
點都好喇，亞視就快玩完，電視行業重新洗牌，港府應該趁機檢討廣播政策，尤其係港台嘅角色，轉為私營又好，乾脆摺埋都好，應該有個了斷，如果繼續諱疾忌醫，遲早自食苦果。