北水湧港令香港股市瘋狂，一日近三千億元成交，令多間銀行和證券行網上交易平台大擠塞，有股民驚青買唔切，心急如焚，飛奔落街親自赴銀行分行買股，排隊買股落盤嘅情況又再出現！
個市好似癲咗，「升得好犀利！」師奶阿伯無不亢奮，全民皆股，自然無視甚麼兵凶戰危，叫人小心謹慎，唔好將全副身家放喺個股市度，阿哥，你未畀人鬧過吖？阻人發達！憎人富貴厭人窮，正一衰神！當一覺瞓醒，o禁個掣又見隻股升到如甩線紙鳶，又賺一個開嘞，唔心郁有鬼咯！尤其嗰隻港交所，兩日來升成五十皮，有股民話，信了早前啲股評家，話隻嘢會跌到百元以下，自己喺一百一十元沽清！家陣喊都無謂，個心揪住揪住係咁泣血！直情慘過失戀一百次。
老朽想起地球上的天氣愈來愈熱，秋冬愈來愈短，早幾日清明，香港氣溫都近三十度。一九九八年夏天，美國侯斯頓市氣溫持續居高不下，有好事者塗鴉街頭，還題上一行字：是誰往溫度計裏放「偉哥」了？眾所周知，「偉哥」呢隻藍威力，係出名嘅壯陽藥，風行全世界，之所以咁鬼賣得，皆因陽痿嘅男人、懷疑自己唔得嘅男人、害怕自己雄風不再嘅男人都會心思思去服食，一下子咁多「勃起功能障礙」嘅「病男」爭住服用，製藥商唔賺死才怪！
全民皆股，就好似係唔係「有病」嘅男人都心思思食「偉哥」一樣！個市升到阿媽都唔認得，究竟是誰在港交所放「偉哥」了？唉！講慣官腔套話嘅財爺就話嘞：現時看不到會有爆破情況，認為有一些實質因素支持股市，惟強調股市波動大、風險大，提醒要小心。哈哈哈，我哋一般人少實踐講套話，說起來難免口窒窒有困難，唯獨鬍鬚曾講慣講熟，已去到藝術境界，好嘢！我Like！