政情：蘇家碧九月中過檔港鐵
我哋早前率先披露，港鐵有意重金禮聘現任工業總會行政總裁蘇家碧（Linda），過檔任港鐵事務總監，報道出街後只有約十日，港鐵尋日就宣布呢項新任命，印證報道準確。Linda將於九月十六日履新，年薪高達三百四十八萬元，雖然表面上年薪無傳聞中嘅五百萬元咁多，但港鐵出名花紅豐厚，仲有約滿酬金，加加埋埋，隨時唔止五百萬元呢個數目。
以Linda嘅資歷，的確係市場搶手貨，佢喺官場歷練深厚，處理過南亞海嘯及埃及車禍嘅災後統籌，見慣大風浪。離開政府前，Linda官至商務及經濟發展局副常任秘書長，實戰經驗夠晒豐富。
事故頻生多棘手
今次佢跳槽去港鐵，主要配合港鐵因業務發展需要，進一步增進同持份者交流及對外溝通。不過，港鐵近年事故頻生，Linda上任後可能要處理好多棘手嘢，真係少啲功力都好難壓得住場。