泛民主派堅決反對人大「八三一」決定下嘅政改方案，但當中嘅溫和派就對政改方案「袋住先」嘅呼聲愈來愈高，以致泛民內部撕裂日益嚴重。繼民主黨前立法會議員黃成智提出支持「袋住先」後，公民黨（公文袋）立法會議員湯家驊亦籌組溫和派論政平台，可見泛民內訌情況已浮面。隨住政改方案出爐在即，泛民就計劃搞個「反袋住先大行動」，其實佢哋只係以宣傳為名，箍住自己友為實。
泛民「飯盒會」召集人嘅公文袋梁家傑尋日宣布，泛民正計劃搞個反袋住先大行動，政改方案一出，就會落區擺街站宣傳反「袋住先」理念，但類似嘅運動早已有大學生自發做緊，泛民只係跟學生哥口水尾。而泛民亦會喺後日開記者會，聲稱要趁《基本法》頒布廿五周年之際搞啲嘢喎。如果真係要搞，點解又唔喺上個星期嘅《基本法》廿五周年正日搞呢？莫非泛民啱啱瞓醒？
另外，立法會議會聯絡小組委員會尋日就同歐洲議會中國關係代表團會晤。其中德國同盧森堡嘅代表聽完泛民講選舉制度後，都叫泛民對政改「袋住先」，認為日後會更有籌碼討價還價。泛民咁崇拜歐美嗰套，唔知今次會唔會聽話呢？