政情：「毛」的放矢 自取其辱

立法會民政事務委員會尋日就深水埗區美孚鄰舍活動中心等社區重點項目進行討論，並非深水埗區議員嘅阿毛就挑機，話該區議會挑選咗仁愛堂作為呢個項目嘅伙伴機構，但當區有區議員就懷疑同仁愛堂有利益衝突。深水埗區議會主席郭振華就解釋，佢哋嘅區議會副主席黃達東係仁愛堂前主席，但黃並無出席揀選伙伴計劃嘅工作，當中不存在利益衝突。

跟住阿毛又話，聽到有意見批評深水埗區議會並冇就重點項目諮詢當區居民。對於阿毛嘅指控，身為深水埗區議員嘅阿基同屬泛民都無面畀，忍唔住開口力撐區議會有就重點項目徵詢過居民意見，佢本人可以做見證咁話。同屬九龍西嘅議員蔣麗芸（Ann）亦都出聲暗寸阿毛，話相信當區區議員會更加清楚當區居民嘅需要，阿毛又點會清楚得過當區區議員呢？

促建新體院 鄧家彪唔知價

委員會尋日亦有討論點樣為精英運動員提供教育及就業支援。勞工界議員鄧家彪就建議當局起多間體育學院，認為新嘅體院起喺另一社區嘅話，會令該區小朋友因為由細睇到大，覺得入到體院好光榮，有利將體育帶到社區咁話，仲質問政府「一年要使幾多錢呢？點解唔做？」民政事務局局長曾德成對於有關意見就好客氣話，現階段未有計劃起第二間體院，又話重建現有體院都要十八億元，望立法會到時批錢，暗寸鄧家彪建議興建體院都食米唔知價。