中環出更：工記的哥 區選撼范國威
區議會選舉將於年底舉行，唔少區議會及立法會嘅泛民主派雙料議員，都成為建制派嘅狙擊對象，其中工聯會（工記）社區幹事高永聯就準備挑戰新民主同盟范國威（Gary）嘅西貢運亨選區議席。高永聯話，選區議員最緊要做好地區工作，唔係學歷高、靚仔就得，從事地區工作超過三十年嘅佢信心十足。
事隔12年再戰
本身係揸的士嘅高永聯，從政經驗都唔少，曾經係民協成員，雖然三次挑戰區選落敗，但依然屢敗屢戰，事隔十二年再度考慮參選。佢話依家主要以打游擊方式做宣傳，每朝會抽兩個鐘上街嗌咪，下晝收工後再擺流動街站。而佢每次擺街站都會出動「三寶」，分別係橙背心、大頭旗幡同腰包咪，希望街坊容易認到佢。
講開對手Gary，高永聯話聽聞唔少街坊開始對佢反感，事關Gary百足咁多爪，根本冇時間做地區工作。最諷刺嘅係，Gary平時打住「民生無小事」旗號，但小小事都幫唔到居民，支持拖篋行動更加係陷害民生同經濟。Gary就回應話，大家即管比併吓地區工作，顯示吓真功夫，歡迎互相競爭。
卓妮