中環出更：張學明夜會鄉紳密斟
新一屆鄉村代表選舉及二十七個鄉事委員會已經喺過去三個月順利完成，隨即輪到新界鄉郊核心嘅鄉議局領導層改選。每逢改選前夕，都有好多傳聞，今屆就有人報料，話鄉議局副主席兼大埔鄉事委員會主席張學明有意競逐鄉議局主席寶座，前晚仲約埋多名北區鄉紳到大埔三門仔一間酒家密斟，莫非真係爭取鄉紳支持？不過，張學明就矢口否認，強調百分百支持發叔做精神領袖。
前日傍晚六點幾鐘，卓妮去咗三門仔一趟，點知真係見到張學明同另外三人喺酒家露天茶座圍埋閒談，期間有講有笑，唔知討論緊咩咁高興呢？到大約七點半左右，上水鄉委會主席侯志強等人就到場，佢哋成班人就由酒家嘅露天茶座轉入廂房用膳。
稱友聚 100%撐發叔
我哋見到張學明、侯志強等人喺包廂入面言談甚歡，不時舉起杯中紅酒，又同身邊人碰杯。大約九點鐘，眾人分別上車離開。
卓妮事後致電張學明問佢做乜咁高興，佢話只係一個朋友聚會，毋須交代傾咗啲咩。被問到係唔係藉飯局拉攏鄉紳支持佢選鄉議局主席，張學明就矢口否認，佢話：「我一直以來都話發叔係鄉議局嘅精神領袖，我話你知，我係百分之一百，聽清楚，唔係百分之九十九，係百分之一百支持發叔嘅！」
卓妮