昔日香港趣怪俗話，有一句「番鬼佬扒龍船──扒親都沉」；番鬼佬在香港扒龍船始於五十年代初期，其時社會窮困，經濟蕭條，洋人欲入鄉隨俗，可惜扒龍船唔係嗰皮，扒得一半，通常啲龍船已全部翻沉，可見其狼狽！
如今，即使冇咗「番鬼佬扒龍船」，香港一樣沉！復活節及清明長假期，烈日當空！市民如果想去離島如長洲、大嶼山、南丫島散吓心，希望重拾離島「歲月靜好」嘅風情，咁肯定喊得一句句！
單係長洲，假期嗰幾日，日日有成幾萬人次來往，去嘅人打晒蛇餅，輪候上船要成三粒鐘；阿哥，香港就算少咗一簽多行嘅個人遊、鳩嗚團，毋須「番鬼佬扒龍船」，睇怕一樣要陸沉喇！
長洲客滿逼爆，去過嘅市民，形容長洲係第二個ＭＫ（旺角），有啲話人潮洶湧過「太平清醮」，太平清醮都有巧奪天工嘅飄色巡遊睇啊，家陣卻是人逼人，排隊買魚蛋、排隊等船、排隊入茶餐廳……長洲──連鹹魚及海水腥味都嗅唔到，嗅到的是高溫下人潮嘅臭汗，見到嘅人頭一個又一個又一個……認真掃興，若然拖住情人去長洲「散心」嘅，如今落得「人頭恒久遠，一顆永留傳」，真係乜鬼浪漫都在人擠人的汗臭中逝去矣！老朽感懷香港昔日有所謂「十景」、「八景」，讀前輩談香港掌故，八景名目是：旗山星火、仙橋霧鎖、鵝澗榕蔭、鴨洲帆影、赤柱朝曦、扶林飛瀑、鯉魚夜月、浪灣海浴。
唉，俱往矣！香港家陣連離島都就陸沉，一字記之曰：悲！港產官僚一味口噏噏當秘笈，一時話開發大嶼山、一時話打造世界級海濱長廊……之不過，如今嘅香港，不論市區還是離島，有的只是一景──「人頭恒久遠」！歲月無聲，惟留汗濕衣嘅香江驚情！