新界鄉議局二十七個鄉事委員會選舉上月底完成換屆，其中選情激烈嘅大埔鄉委會更加係大執位，正、副主席齊齊換班，由鄉議局副主席張學明取替文春輝，接掌大埔鄉委會。文春輝失落大埔鄉委會主席，等同失去大埔區議會當然議員議席，連帶區議會副主席之位都要退位讓賢，另擇吉日再選。據知鄉事派陳笑權及民建聯（民記）黃碧嬌都有意爭奪區議會副主席一職。
大埔區議會下周一召開特別會議補選副主席，選前大熱除咗身兼民記大埔支部主席嘅黃碧嬌外，據聞「出爐」大埔鄉委會副主席陳笑權亦有意競逐，但據知真命天子會係黃碧嬌。眾所周知，張學明有鄉事及民記雙重身份，但鄉事背景較濃，據知鄉事派為避免再由「自己人」同時出任正、副主席，加上民記勢力亦不容小覷，決定讓路予區議會內唯一女將黃碧嬌出任副主席。
我哋問過黃碧嬌，佢承認已獲張學明推薦，遞表參選副主席，但亦不忘同鄉事派拉近距離，自言嫁畀大埔原居民老公，亦已獲邀加入大埔鄉委會成為當然委員，都算係半個「自己人」喎。黃碧嬌仲話，二○○○年當選區議員至今，已經同其他區議員組成「兄弟班」，能否當選副主席就要靠「兄弟」支持咁話。至於文春輝點睇呢位女將接任？佢就話已經不在其位，無謂評論喇。