香港專上學生聯會（學聯）作為支聯會創會成員，每年例牌要派代表參與維園舉行嘅六四燭光晚會，但年初港大成功退出學聯（退聯）後，港大學生會嘅時事委員會打算係今年六四另起爐灶，籌備校內悼念活動，同支聯會搞嘅維園晚會分庭抗禮。不禁要問，港大學生會過往因為有學聯或支聯會成員身份，先至去參加維園六四燭光晚會嘅咩？
港大學生會會長馮敬恩承認，有委員提出籌備校內晚會嘅初步建議，佢地將會係四月底嘅時委會會議正式討論同落實具體細節，期望籌組一個開放畀公眾參與嘅悼念晚會。馮敬恩澄清，學生會籌備嘅晚會同支聯會晚會並無衝突，相信雙方都係本着「平反六四，建設民主中國」嘅信念，學生會去年都有係校園同時宣傳尖沙咀本土晚會同支聯會維園晚會，等同學按照個人意願自由選擇。
港大退聯兩個月，雖然學聯或港大學生會否認會有影響，仲口口聲聲話維持友好關係，但學界二十五年來首次唔再統一支援六四活動，相信退聯後遺症將會喺日後逐步湧現。