政情：公帑「請客」 廢鑊又爆大鑊
人稱「廢官」嘅食物及衞生局前局長周一嶽（周一鑊），自前年獲「翻閹」出任平等機會委員會主席以來，引起無數爭議同火頭。繼多次高調出席同志團體活動、提議修訂引入「事實婚姻」概念後，我哋早前更踢爆佢建議喺平機會架構下加設月薪逾十六萬元嘅營運總裁一職，引起公眾嘩然。最新一鑊係佢首次帶團北上交流，但據聞隨團嘅公營機構要攤分內地講者嘅團費，被質疑係濫用公帑。
據聞周一鑊上月致函二十三間公營機構，邀請佢哋嘅高層參加由中聯辦協辦、北京清華大學主辦嘅法定機構研討會，由北京清華大學兩名講者、廣東省官員、內地法定機構代表講解中國現代化進程，以及探討點樣有效監察政府運作等。研討會將會喺下月二十三至二十四日舉行，地點可能係深圳紫荊山莊，現時大約有七至八間本港公營機構參加。
主題似乎同民生無關
周一鑊首次擔任團長就爆鑊，惹來唔少批評。事關佢喺信中提及，參與機構代表除咗要自付團費及食宿開支，仲要分擔埋兩名主講嘉賓嘅演講、機票同住宿費用。如果參加人數唔多，各間機構負擔嘅費用亦會隨之增加。雖然幾千元並唔係大數目，但公營機構始終係由公帑資助，而交流主題又似乎同本港民生冇乜關係，無故幫內地講者支付費用難免會引來濫用公帑之嫌。有份獲邀嘅公營機構代表亦批評，類似嘅交流團舉辦次數太多，今次已經係第三次，同埋唔明點解一定要北上囉！
獲邀機構嫌辦得太多
其實今次北上交流問題多多，包括要幾多機構參加先成團，如果參加嘅機構數目唔理想，平機會又會否考慮取消行程呢？參與機構要攤分內地講者嘅開支，而參加人數愈少，分擔嘅費用就愈多，究竟平機會有冇就相關費用設上限呢？既然獲邀者都批評類似交流團舉辦次數太多，平機會有冇檢討過成效先決定繼續舉辦呢？我哋曾經就上述問題向平機會查詢，可惜喺截稿前仍未回覆。