中環出更：手帶識震 黎棟國唔瞌眼瞓
保安局局長黎棟國早前被發現喺立法會會議期間「瞌着覺」，當局事後已解釋，話局長係感冒不適食咗藥，而局長亦承認去立法會前幾日啱啱去完日本旅行，旅程中感冒，回港之後服食咗成藥，萬料不到會咁眼瞓。不過，相信呢個「瞌着覺」畫面應該唔會再出現喇，點解？局長笑笑口揮一揮右手話，因為有人會「震」醒佢喎！
卓妮望一望局長嘅右手，原來戴上咗一條運動手帶，佢話手帶嘅其中一個功能，就係可以經藍芽接駁智能手機，每當手機有來電就會震動，笑言以後一旦喺立法會會議上「企圖」合上眼，佢嘅新聞秘書就會打電話「震」醒佢咁話。
網上購入 百幾蚊到手
黎棟國話，呢條運動手帶係佢一個後輩幫佢喺網上購物買返嚟，一百幾蚊就到手，價廉物美，配合埋手機App，可以幫佢計埋每日步行步數、睡眠質素，計算每日有幾多個鐘深睡，幫佢監察埋健康。佢又話，每天都要瞓八個鐘頭，仲講笑咁話自己其中一個「優勢」，就係一上床就幾乎可以即刻瞓着，瞓醒覺就可以精神奕奕，面對每日忙碌嘅工作。
卓妮