中環出更：阿蘇冇到 嫻姐好勞嘈
財政司司長曾俊華（鬍鬚曾）喺今年度財政預算案提出將外地流行嘅美食車（Food Truck）引入香港，振興本土旅遊業。由立法會議員陳婉嫻同香港中文大學建築系副教授鄭炳鴻、文化界人士胡恩威組成嘅「天橋底行動」就先搶飲頭啖湯，喺義賣墟市引入「美食車」，仲邀請鬍鬚曾及負責旅遊範疇嘅商務及經濟發展局局長蘇錦樑（Greg蘇）出席，點知Greg蘇請都唔到。
財爺嫌漫畫公仔太惡
「天橋底行動」尋日喺觀塘海濱天橋底搞咗個義賣墟市，嫻姐就搵架貨車充當「美食車」，仲喺車上畫上鬍鬚曾拎住串魚蛋嘅Ｑ版公仔漫畫。嫻姐話，改裝一架美食車要七十萬元，佢哋搞一次活動當然唔使咁多錢，但就希望政府可以資助有意經營美食車嘅販商。鬍鬚曾一見到個漫畫公仔，就嫌畫得佢太惡，仲即場展露笑顏派魚蛋同砵仔糕畀在場小朋友，好似想話畀人知佢不知幾隨和。
嫻姐盼美食車周圍去
唔知係咪Greg蘇冇出席，架美食車就冇畫到Greg蘇個樣。嫻姐仲乘機大數Greg蘇完全聽唔明佢講乜咁︰「蘇錦樑話（美食車）係企喺度（固定地點），我哋笑佢咁同排檔有咩分別？」嫻姐仲形容簡直係個「大笑話」。佢希望美食車嘅概念最終可以做到好似電影《滋味旅程》咁，架車可以周圍去喎。
Greg蘇透過新聞秘書回覆，嫻姐約佢嘅時候咁啱計劃離港，所以先推咗，點知又遇着亞視風波，所以先取消離港，強調同嫻姐係好朋友，兩人並無芥蒂咁話。不過，既然Greg蘇咁忙，點解又得閒出席今日灣仔會展一個珠寶商業活動呢？雖然佢唔去，但嫻姐仍心情大靚，唔止向卓妮大讚墟市擺賣嘅有機粟米超甜，又花咗約二百元向墟市擺檔嘅女青年設計師買咗一隻熊貓圖案戒指及一條黑色五角星頸鏈，仲急不及待戴上身添，真係估唔到嫻姐都咁潮喎。
卓妮